काठमाडौं, २४ वैशाख । पेटको शल्यक्रिया गरेर स्वास्थ्यलाभ गरिरहेका जसपाका संघीय परिषद् अध्यक्ष तथा पूर्वप्रधानमन्त्री डा. बाबुराम भट्टराई यतिबेला वीर अस्पतालमा छन् । अस्पतालको बेडबाट उनले नर्सहरुलाई दोस्री आमाको संज्ञा दिएका छन् ।
बिरामीको सेवामा समर्पित नर्सहरुसँगको तस्बिर पोस्ट गर्दै डा. भट्टराईले भनेका छन्, ‘हाम्रा दोस्री आमा यी नर्सहरू !’ उनले न्यूनतम वेतनमा काम लगाएर र लामो समय करारमा काममा लगाएर नर्सहरुको शोषण भएको सन्दर्भ पनि उठाएका छन् ।
यस्तो छ नर्सहरुबारे डा. भट्टराईको टिप्पणी-
‘हाम्रा दोस्री आमा यी नर्सहरू !’
स्कूलमा फ्लोरेन्स नाइटिङ्गेलको जीवनी “Lady With The Lamp” पढेर नर्सहरूको पेशागत महानताबारे पहिलो पाठ बुझिएको हो !
पछि जीवनमा पटक पटक हस्पिटलमा उनीहरूको महत्वपूर्ण भूमिकाबारे प्रत्यक्ष भेगिएको पनि हो।
तर यसपटक वीर हस्पिटलमा (खास गरी अपरेसन पश्चातका पाँच दिन ICU मा ) बस्दा नर्सहरू हाम्रा जन्मजननी आमाकै नयाँ अवतार भएको अन्तरहृदयैदेखि अनुभूति भयो !
कहिल्यै नचिनेका, कुनै नातासाइनो नभएका रोगी/अशक्त/अचेत मानिसहरूको दिसापिसाब सोहोर्ने, प्रदुषित शरीर सफा गर्ने, डाइपर समेत लगाइदिने, रातदिन झर्को नमानी बिरामीहरूको स्याहार गर्ने काम अरू कसले गर्न सक्छ ?
अनि उल्टै उनीहरूलाई नै ‘…छोरी बिग्रे नर्स…’ भनेर हेप्ने ?
१२/१३ वर्षसम्म करारमा काम लगाउने ? न्यूनतम वेतन दिन समेत आनाकानी गर्ने ? प्रोत्साहन भत्ता रोकेर राख्ने ?….
यस्ता साक्षात ‘देवी’हरू,हाम्रा दोस्रो आमाहरूलाई हार्दिक नमन !!
The post नर्सहरु आमाकै नयाँ अवतार रहेछन्ः डा. भट्टराई appeared first on Sajha Post.